Greis – Teil Vomne Ganze Lyrics

[Verse 1: Greis]
I bi nes Ching vo däm Land, bi nes Lokauprodukt
I weiss wohäre i ga, i weiss oh gnau wohär i chumm
Bi nid vom erschten Ouguscht, wüu denn isch nüt passiert wo üs betrifft
Wennscho sy mer Ching vo 1848
Ryyse Gschicht, doch Rütli chunnt dört nid vor
Chriege öfter gägenang aus mitme böse frömde Vogt
Ke Armbruscht, wüu Habsburg sy denn Verbündeti
Wes Gessler und Tell hätt gäh wäre si beschti Fründe gsi
Hei Bünd gschlosse, broche, wider ernöieret
Sy denn no Eidgenosse vo Schwaben und vo Savoye
Was üs verbindet ir Schwiz sit 1300
Für ds haube Jahrtuusig isch der Export vo üsne Chinder
Verchoufe ganz Europa Soldate, mir wei verdiene
Kämpfen i jedem Chrieg für Gäud, uf beidne Syyte
500 Jahr sy mir bezahlti Barbare
Mit Hellebarde wo aues abfackle i frömde Länder

[Chorus]
18-48, 18-48
18-48, 18-48
I bi stouz uf üsi Gschicht, üse Wäg
Mir sy ds viufäutigschte Land wos git uf der Wäut
Wüu mir dä Wäg oh nie elei gange sy
Mir sy Teil vomne Ganze ob mers wei oder nid
I bi stouz uf üsi Gschicht, üse Wäg
Mir sy ds viufäutigschte Land wos git uf der Wäut
Mir sy frei hüt
Mir wäre nid frei ohni si
Mir sy Teil vomne Ganze ob mers wei oder nid

[Verse 2: Greis]
Hüt sy mer souverän, neutral, me würds üs nie gäh
Aber denn wird üses Land no prägt vo Bürgerchriege
Schliessen Allianze mit usländische Mächt
Und zieh gmeinsam id Schlacht gäg angeri Schwizer Städt
I bi ne Sohn vom Waadtland sit Ahfang vom Stammboum
Wärde wi ds Aargou eroberet vom Bärner Landvogt
Hei Stüüre zahlt u bim Wähle nid dörfen antworte
Chunnt der das irgendwie bekannt vor?
U Bärn het üsi Chnächtschaft nie usenandgnoh
Sy nach 300 Jahr befreit worde vo de Franzose
Doch mini Ching wärde Bärner u dasch normau so
Si wählen ihri Sprach, Religion, ihre Standort
D Hiuf vo usse het üs immer wider grettet
Ohni Schlichtig hätte mir üs gägesytig abegmetzlet

Sit 1803, dank eme Usländerfride, hey
Was üs sit immer usmacht isch üsi Verschideheit

[Chorus]
18-48, 18-48
18-48, 18-48
I bi stouz uf üsi Gschicht, üse Wäg
Mir sy ds viufäutigschte Land wos git uf der Wäut
Wüu mir dä Wäg oh nie elei gange sy
Mir sy Teil vomne Ganze ob mers wei oder nid
I bi stouz uf üsi Gschicht, üse Wäg
Mir sy ds viufäutigschte Land wos git uf der Wäut
Mir sy frei hüt
Mir wäre nid frei ohni si
Mir sy Teil vomne Ganze ob mers wei oder nid

[Verse 3: Greis]
När sy si cho di Italiäner
Di Albaner u di Tscheche, di Türgge mit ihrne Döner
Ihrne nid anekannte Qualifikatione
Ihrer Arbeitschraft, ihrne Byträg i Millione
Frag di ob Migration für üsi Wirtschaft schlächt sig
I 30 Jahr si zwöi Drittu vo de Schwizer über sächzgi
Mau luege wis denn usgseht we mer d Gränze schliesse
Ob di Pensionierte dr Lade schmeisse u d Ränte fliesse
De säg de Dütschen itz si söue zrügg aber je nach Kanton bisch länger Teil vo ihrer Gschicht gsi aus Teil vo der Schwizer
Säg ne si söue zrügg, de Libanese, ohni si wär d Uhrenindustrie für immer i de Ferie
Säg ne si söue zrügg, de Hugenotte, wo ir Ufklärig sy cho und hie ds Lokalgwärb ufbout hei
Gang zu dine Fründen und verzeu dass di erschte Helvete sy dahäre zogen usem Elsass

[Chorus]
18-48, 18-48
18-48, 18-48
I bi stouz uf üsi Gschicht, üse Wäg
Mir sy ds viufäutigschte Land wos git uf der Wäut
Wüu mir dä Wäg oh nie elei gange sy
Mir sy Teil vomne Ganze ob mers wei oder nid
I bi stouz uf üsi Gschicht, üse Wäg
Mir sy ds viufäutigschte Land wos git uf der Wäut
Mir sy frei hüt
Mir wäre nid frei ohni si
Mir sy Teil vomne Ganze ob mers wei oder nid

Leave a Reply

Your email address will not be published. Required fields are marked *